Թեև Տիգրան Մանսուրյանը բազմաթիվ ու բազմազան երաժշտական ստեղծագործություններ ունի, սակայն արվեստասերների լայն շրջանակին հայտնի է իր կինոյի համար գրված երաժշտությամբ. առանց մեծ կոմպոզիտորի երաժշտության ուղեկցության անհնար է պատկերացնել «Նռան գույնը», «Ճերմակ անուրջներ», «Կտոր մը երկինք», «Մենք ենք մեր սարերը», «Հին օրերի երգը», «Մեր մանկության տանգոն», «Տերը» և շատ այլ հայ կինոյի դասական գործեր: Այս ֆիլմերից շատերը հայ գրականության հայտնի գործերի էկրանավորումներ են, սակայն սրանով կոմպոզիտորի ու գրականության կապերը չեն սահմանափակվում: Հայ պոեզիայի մեծ սիրահար ու գիտակ Տիգրան Մանսուրյանը հեղինակել է նվագախմբի, երաժշտական առանձին գործիքների ու երգչախմբի համար գրված բազմաթիվ ստեղծագործություններ` հայ բանաստեղծների գործերի հիման վրա: Ներսես Շնորհալի, Նահապետ Քուչակ, Հովհաննես Թումանյան, Վահան Տերյան, Եղիշե Չարենց, Համո Սահյան և այլք. հայ դասական հեղինակների հայտնի ու անհայտ շատ բանաստեղծություններ գտել են իրենց յուրահատուկ մեղեդային արտահայտությունը Մաեստրոյի ստեղծագործության մեջ: Art365-ը ներկայացնում է Տիգրան Մանսուրյանի՝ հայ պոեզիայի նմուշների հիման վրա տարբեր տարիների ստեղծված գործերի մի փունջ:
Ներսես Շնորհալի, «Հաւատով խոստովանիմ» (ալտի և տղամարդկանց երգչախմբի համար, 1999)
2012 թվականին կայացավ Տիգրան Մանսուրյանի «Canti Paralelli» («Զուգահեռ երգեր») երգաշարի պրեմիերան: Երգաշարը նախատեսված է դաշնամուրի և վոկալի համար և ընդգրկում է 4 բանաստեղծի 8 գործ՝ Պաղտասար Դպիր` «Տաղ կորուսեալ սիրելոյ», «Վասն սիրոյ», Եղիշե Չարենց` «Կապույտ լճի վրա», «Եվ մի իրիկուն», Ավետիք Իսահակյան` «Իմ հոգին», «Լեռների վրա ձնել է…», Վահան Տերյան` «Աշնան երգ», «Իմ խաղաղ երեկոն է հիմա»:
Թերևս ամենից շատ անդրադարձներ եղել են Եղիշե Չարենցի ստեղծագործությանը: Բացի «Զուգահեռ երգերում» ընդգրկված գործերը, Մաեստրոն հեղինակել է նաև Չարենցի՝ «Արվեստ Քերթության»՝ երգչախմբի համար գրված գործը: Ինչպես նաև կրկին երգչախմբի համար ստեղծված՝ «Ես իմ անուշ Հայաստանի», «Աշնանային» ստեղծագործությունները.
«4 հայրեն Նահապետ Քուչակից»(1967)
Վահան Տերյան, «Երկիր Նաիրի»(1984)