Ինչպես ժամանակակից աշխարհում շատ ու շատ բաներ, արվեստը, այն ներկայացնող թանգարանները, ուսումնասիրող կազմակերպությունները, աստիճանաբար տեղափոխվում են օնլայն հարթակներ: Ստեղծվում են հետաքրքիր կայքեր ու հավելվածներ, որոնց շնորհիվ արվեստասերը ամեն օր, օրվա մեջ թեկուզ 5 րոպե հատկացնելով կարող է ծանոթանալ համաշխարհային արվեստի գլուխգործոցներին, դրանց ստեղծման պատմությանը, քայլել մեծ թանգարանների վիրտուլ դահլիճներում, խաղալ ճանաչողական խաղեր՝ նույնիսկ տնից դուրս չգալով, կամ երթուղայինի մեջ: Արվեստը ներկայացնեղ հավելվածները շատ-շատ են, սակայն կան լավագույնները, որոնք կարող եք գտնել ու անվճար ներբեռնել Play Store-ից: Ցավոք, այս հավելվածներում շատ քիչ է ներկայացված հայ արվեստը, ինչը պայմանավորված է ի թիվս այլ հանգամանքները, նաև մեր արվեստասերի պասիվությամբ. եթե մենք ակտիվորեն օգտագործենք այդ հավելվածները, հնարավոր է, այնտեղ հայտնվեն նաև մեր արվեստի հետ առնչվող նյութեր: ART365-ը ներկայացնում է ART հավելվածների իր ընտրանին:
1.Google Arts & Culture
Ինչպես իր բոլոր նախագծերում, այստեղ ևս Գուգլը զարմացնում է այս հավելվածի ընդգրկումներով, իրականացման բարձր որակով ու ճաշակով: Բացի աշխարհի թանգարաններում վիրտուլ շրջագայությունները, արվեստը ներկայացնող անչափ հետաքրքիր հազարավոր հոդվածները, այստեղ կարելի է գտնել ճանաչողական խաղեր, երևակայությունը զարգացնող ուշագրավ նյութեր, ուսուցողական ծրագրեր: Կարելի է դիտել, ընթերցել, լսել արվեստը, ամեն օր՝ բացահայտելով որևէ նոր ու անչափ հետաքրքիր երևույթ, հասկացություն, արվեստագետի: Ի դեպ, հավելվածում մի մեծ ու ընդգրկուն հոդված կա՝ նվիրված Մարտիրոս Սարյանին:
2.Daily Art
Եթե դուք գեղանկարչություն ու քանդակ եք սիրում և արվեստից ամեն օր ներշնչման կարիք ունեք, այս հավելվածը լավագույն լուծումներից է: Այն ամեն օր ներկայացնում է համաշխարհային գեղանկարչության կամ կիրառական արվեստի որևէ գործ, ապա նաև դրա ստեղծման պատմությունը, հետաքրքիր տարբեր փաստեր: Հավատացնում ենք, որ լարված ու զբաղված օրվա մեջ մեծ բավականություն կստանաք, երբ հավելվածն իր հաղորդագրությամբ կտրի ձեզ հոգսերից ու ներկայացնի որևէ բարձրաճաշակ գործ:
3.«Ռադիո Արզամաս»
Եթե դուք նախընտրում եք ռուսերեն լեզվով հաղորդակցվել արվեստի աշխարհի հետ, նաև սիրում եք լսել, ապա այս հավելվածը շատ հարմար տարբերակ է: «Արզամասը» մի մեծ կրթական, ճանաչողական, ժամանցային ծրագիր է՝ զարմանալի բազմազան նյութերով, մշակութային ու հասարակական բազմազան թեմաներով հիանալի դասախոսություններով ու դասընթացներով: Ռուսական ու համաշխարհային մշակույթն այստեղ ներկայացվում է հնարավորինս ժամանակակից, մատչելի ու անչափ հետաքրքիր մոտեցումներով:
Հեղինակ՝ Հայկ Համբարձուման