1919 թ. հունվարի 20-ին է ծնվել հայ նշանավոր բանաստեղծուհի Սիլվա Կապուտիկյանը(1919-2006): Բանաստեղծուհին երկարամյա բեղուն ստեղծագործական ընթացք է անցել՝ հեղինակելով չափածո ու արձակ բազում գրքեր: Նրա ստեղծագործությունները սիրվել ու սիրված են Հայաստանում և Սփյուռքում: Նրա նուրբ, քնարական սիրային գործերը վերածվել են երգերի, որոնք այսօր էլ կատարվում ու լսվում են: Art365-ը առանձնացրել է Սիլվա Կապուտիկյանի բանաստեղծությունների հիման վրա ստեղծված ամենասիրված երգերը: Ընթերցե՛նք ու ունկնդրե՛նք:
Ասում են թե...
Այնպես անփո՜ւյթ, այնպես հանգի՜ստ
Անցնում ես դու մեր տան մոտով,
Մինչ ես ուրիշ տներում իսկ
Քե՜զ եմ փնտրում դեռ կարոտով:
Եվ այնպես հեշտ, այնպես խնդուն
Մատնո՜ւմ ես դու ինձ աշխարհին.
Մինչ դողում է, որպես երդում,
Քո անունը իմ շուրթերին:
Հյուրանոց է սիրտը քո բաց,
Հեշտ գալիս են, հեշտ էլ գնում,
Իմ սիրտն՝ ամրոց, որտեղ անդարձ
Դու ես փակվել ու չե՜ս ելնում:
Եվ ինքս իմ դեմ լուռ մռայլվում՝
Սիրուս համար խանդում եմ քեզ,
Որ հեղհեղուկ այս աշխարհում
Դու սիրահա՜ր ունես ինձ պես:
Երաժշտություն՝ Խաչատուր Ավետիսյանի
Կատարումը՝ Հովհաննես Բադալյանի
Մի լացացնի
Մի լացացնի շատ եմ լացել, սիրելիս,
Դու մի կարծիր պաղ եմ այսպես ու գոռոզ,
Սիրտս շատ է լցված եղել վերքերով,
Սպիներից է կարծրացել, սիրելիս:
Հոգնել եմ ես ցավոտ, դավոտ սերերից,
Ամենքի դեմ սիրտս բացած, աչքս` փակ,
Քար է եղել նրանց շքեղ կրծքի տակ,
Իսկ ես, ավաղ. սիրտ եմ կարծել, սիրելիս:
Հոգնել եմ ես, թող որ քնեմ ես հանգիստ,
Մանկան նման` ծնկիդ գլուխս դրած,
Ինձ խնայիր ու գուրգուրա ինձ վրա,
Ժամս է արդեն իրիկնացել, սիրելիս:
Երաժշտությունը՝ Վաչե Հովսեփյանի
Կատարումը՝ Ատիս Հարմանտեան
Մախմուր աղջիկ
Մախմուր աղջիկ,
Քիչ տխուր աղջիկ,
Աչքերդ հազարախոս,
Շուրթդ լուռ աղջիկ:
Երնեկ նրան,
Ով որ կանգնի քո դռան,
Ջուրդ խմի, կաթնաղբյուր աղջիկ:
Նազով աղջիկ,
Թուխ մազերով աղջիկ,
Ծաղիկ ես, չթառամես
Մուրազով աղջիկ:
Մնա քնքուշ,
Բուրիր բույրով քո անուշ,
Աշխարհ լցրու երազով աղջիկ:
Երաժշտությունը՝ Խաչատուր Ավետիսյանի
Կատարումը՝ ԴԵՏՔ խումբ
Թե ես չեմ սիրում
Թե ես չեմ սիրում, չեմ սիրում քեզ,
Ինչու է ձմեռն այսքան գարուն,
Ձմռան արևը այսքան այրում,
Անխոս երկինքը այսքան անհուն:
Եթե ես չեմ սիրում, չեմ սիրում քեզ:
Եթե դու չես սիրում, չես սիրում ինձ,
Հապա ինչու են ձեր փողոցում
Այդքան սիրով ինձ ճամփա բացում.
Անցորդներ, տներ, մայթեր ու ձյուն,
Եթե դու չես սիրում, չես սիրում ինձ:
Ու թե չենք սիրում մենք իրարու,
Ինչու են աստղերն այսքան անթիվ:
Այսքան գեղեցիկ գիշեր ու տիվ,
Աշխարհը այսքան հաշտ ու ազնիվ,
Եթե չենք սիրում մենք իրարու:
Երաժշտությունը՝ Լևոն Արևշատյան
Կատարումը՝ Գոռ Սուջյան, PROJECT LA
Թե աչքերս քեզ որոնեն...
Թե աչքերս քեզ որոնեն,
Ես կփակեմ մութ կոպերով,
Որ աշխարհում քեզ չտեսնեն:
Թե խենթ լեզուս անունդ տա,
Ես կսեղմեմ ատամներով,
Որ հնչյուն իսկ չշշնջա:
Բայց երբ սիրտս, սիրտս է ուզում
Ձայնել ու քեզ տեսնել իր դեմ,
Ինչո՞վ փակեմ սրտիս լեզուն,
Սրտիս աչքը ինչո՞վ փակեմ...
Երաժշտությունը՝ Լևոն Սևանի
Կատարումը՝ Հարութ Փամբուկչյան